આં રચના અશોકભાઈનાં બ્લોગ પરથી મેળવી છે. પહેલા જણાવ્યા પ્રમાણે પકૃતિ અને નૈસર્ગિક સૌંદર્યને લગતી રચનાઓ માટે મને વિશેષ માયા છે તેથી જ અશોકભાઈના બ્લોગ પર આ રચના વાંચ્યા બાદ તેને અત્રે રજૂ કરવાની ઈચ્છા રોકી શકયો નથી.
કયાં છે ?
જાંબુડાના ઝાડ ઉપર લટકતો
લીલો લીલો મારો સૂરજ કયાં છે ?
ક્યાં છે મારા ખેતરખૂણાના કૂવામાં
કબૂતરાંની પાંખો ઉપર સૂતેલો
ભોળો ભોળો અંધકાર ?
પ્રભાતપંખીનાં પગલાની લિપિમાં
આળખેલો ડુંગર ફરતો ,
ચકરાતો એ ચીલો કયાં છે ?
કયાં છે મારી પથ્થર વચ્ચે
પાણી લઈને વહેતી
શમણા જેવી નદી ?
વનપરીના નાનકડા ખોબા જેવી
તરંગની આંગળીઓ વચ્ચે
પવન રમાડતી
પેલી મારી તલાવડી કયાં છે ?
કયાં છે મારું ટેકરીઓનું ગામ,
ગામનું ઘર,ઘરની કોઢ,કોઢમાં
અંધારાની કાળી ગાયને દહોતી મારી બા ?
કયાં છે.......
-જયન્ત પાઠક (Jayant Pathak)
No comments:
Post a Comment